قهوة المنتدى *** المصريين كافيه 2008

انا هنا يا دون دون بس بشوف كل الردود فى القهوه وهرد على الموضوع بس خليكى معايا وعايزين باقى الاعضاء اللى عالمنتدى يجو يقعدو معانا عالقهوه دلوقت

السلام عليكم
انا هبتدى بس مش عارف منين بالظبط
انا اولا ضد فكرة ان الواحد يسيب مصر او انه يروح يشتغل بره دى فى حد ذاتها فكره فاشله
لكن بالنسبه للوسطه والتاهيل العلمى بشهادات خبره وكورسات وكده؟ دا لابد منه فى اى حته سواء بوسطه او من غير وسطه لكن هى كل المشكله اللى انا شايفها واللى هتطرق ليها بجانب اخر من الحديث عن البطاله بشكل عام
انا دلوقت لو سالت مودى تحب تشتغل ايه او دون دون او اى شاب عاطل لسه ماشتغلش نفسك تشتغل ايه؟؟ مش هيعرف يرد باى حاجه اساسا خااااالص
يا فرحتى بكونك عايز تشتغل وانت مش عارف تشتغل ايه؟ ويا فرحتى التانيه بانك لو اشتغلت فى اى حته وانت مش فاهم حاجه فى اللى انت بتشتغله
انا عندى ما تشتغلش وتقعد تندب فى حظك احسن ما تشتغل فى شركه وتبوظ الدنيا وتخلى المراتب الاعلى منك عمليا فى الشغل يكتبو فيك تقرير والذى منه لحد الرفد وترجع تقول مفيش شغل تانى
النظام يا جماعه اساسه فاشل نظام التعليم فاشل مافهوش اى درايه بالمحركات الاساسيه للحياه العمليه كله دش او حفظ فى حاجات متعرفش بتدرسها ليه ومعادلات مش مقنعه كلام كله على بعضه مش متركب
انا حاسس ان هنا فى مصر بيطبقو علينا عمليا قدرة العقل البشرى بعد الفول والطعميه يعنى زى ما بيعملو عالفران والقطط بره
انا شايف ان كل واحد مننا يوجه نفسه ناحية الحاجه اللى يقدر يعملها فى حاجات كتيره اوى ضاعت علينا الفرص بفضل الروتين الحياتى فى مراحل عمريه مختلفه
انت دلوقت راجل او ست انت اللى مسئول عن تصرفاتك خلاص حاول توجه نفسك ناحية الافضل من وجهة نظرك مش كيميا ومش معادلات ومش دش عالفاضى
انا عايز اقول ان العامل فرصته فى النجاح فى مصر احسن من الطالب الجامعى
العامل مهما وصل يا جماعه فى مصر بش مهندس لكن تقدر تقولى فى كام محاسب فى مصر؟؟ وهل بيشتغلو محاسبين؟؟ وبيتقالو ان شالله حتى استاذ ؟ ولا الهوى كله كلام عالفاضى
الشهاده دى ورقه وخلاص وعليها ختم مش اكتر لكن الخبره وفنيات التعامل فى الحياه المهنيه انت اللى بتصنعها لنفسك وبتوجه نفسك ليها مش حد تانى

انا طولت عليكو كتير ولسه ما طلبتش حاجه وسامع ان مشاريبكو جميله جدا عالعموم انا عايز

موز والله موز

والله يا بندق أنت كلامك مقنع بس للأسف مش منطقي
يعني نيجي نبص مثلا عن شاب مكافح و عرف هوه نفسه يشتغل ايه و خد كورسات بالشيئ الفلاني و عرف نظام شغلو كويس
كده الراجل عداه العيب
هل يا ترى بقا عم المكافح ده هيلاقي شغل
و حتى لو لاقى شغل هل شغلو ده هيخليه يعتمد على نفسو
و يجيب شبكه عشان عايز يخطب و يفتح بيت و يصرف عليه
للأسف الجواب معروف؟؟؟؟؟؟؟؟؟؟
لآ طبعا
مفيش كده الا أذا كان أبو الواحد مساعدو أو واحد طلع لقى باباه عندو شركاتو شغلو
و معاك واحد فراوله باللبن
و متنساش حجر التفاح

ههههههههههههههههههههههههههههههههههه
على فكره مفيش شيشه عندنا هنا معلش يا كسبر بقى ممنوع الشيشه احنا هنا اصدقاء البيئه

بص انا بتكلم فى القضيه بشكل عام من وجهة نظرى والقضيه دى كبيره اوى مش صغيره وليها ابعاد كتيره جدا جدا عشان كده انا بشكر دون دون لان الموضوع فعلا محل جدل كبير اوى

لكن
فى الاكيد والواضح والطبيعى دلوقت ان الاب لازم يساعد ابنه فى حياته المستقبليه ماهو دا اللى انا قلته فى اخر ردى ان النظام فاشل انت اساسا محتاج بعد ماتتخرج على الاقل سنتين تلاته تاهيل عشان تعرف انت هتشتغل ايه وهتشتغل ازاى وايه هو محل رزقك فى المستقبل وتبتدى تبنى خبرتك عليه
نحسبها بالورقه والقلم مع بعض
انت بتضيع 4 سنين كليه و3 سنين تاهيل وكورسات وبتدور على شغل وكده بقو 7 سنين لو حسبت انك فى السنه دى شغل هتاخد مثلا بمقدار 400ج شهريا بمعدل 5 الافف جنيه فى السنه فى 7 ب 35 الف جنيه مصرى قابل للصرف فى مشروع ب20 الف جنيه و 15 الف بتوضب بيهم الشقه اللى والدك جايبهالك يبققى انت كده هتتجوز وتجيب شبكة وكل اللى بتحلم بيه وتكمل حياتك على خير
دا لو انت خارج من الثانوى مؤهل التاهيل الكامل للعمل لكن الطلاب بيخرجو من ثانوى عادمنين العافيه اساسا كارهين الحياه وكارهين كل حاجه من الدروس الخصوصيه والنظام الفاشل فى المدرسه لالالالالا
فى مليون حاجه غلط لازم تتغير ما ينفعش كده
مصر مش بنت امبارح ولا اول مص دى ام الدنيا يا جماعه احنا لازم لنا حل جذرى

هاتلى عناب ساقع عشان يروق والله يروق دمى

جااااااااااامده جدا الفكره دى يا بازارو

وميرسى جدا انك رشحتنى انا ودندن اننا نقترح اول موضوع فى قهوه المصريين

وسورى يا جماعه معلش انا مكنتش موجوده ساعه ما بدأتوا الموضوع

علشان كده انا برد متاخر

وبالنسبه بقى للموضوع اللى دندن اتكلمت فيه هو فعلا موضوع جميل ومحتاج نقاش جامد

انا طبعا يا جماعه رافضه مبدأ هجره الشباب للعمل بالخارج مع انى عارفه كويس ان الفكره

دى هى حلم كل شاب مصر ، لكن مش ده الحل

مصر فيها شغل يا جماعه وفيها اماكن كتير للعمل مش مفيهاش زى ما احنا مطلعين عليها

ممكن يكون صعب شويه لكن موجود

ما احنا مينفعش اننا نتخرج ونقعد فى البيت مستنين الشغل يجى لغايه عندنا وبعدين نقول

مفيش شغل ؛ لو كل شاب خلص دراسته ونزل ودور على شغل بجد اكيد هيلاقى بس والنبى

ميجيش شاب يتمسكلى بشغلانه معينه ولا مكان معين عاوز يشتغل فيه ولما ميلاقيش

يرجع يقول مفيش شغل

اصل فى كتير من الشباب عاوزين يبدأو بمستوى معين وده صعب جدا

فيها ايه لما تبدأ من تحت شويه وتكبر مع الوقت ولا هو انت لازم تبدا وانت رجل اعمال ؟

ما كل الناس الكبيره اللى انتوا شايفنها قدامكم دول بدأين من تحت الصفر زى احمد عز ولا صلاح دياب

ولا محمود العربى مثلا صاحب اكبر شركات العربى للاجهزه ده كان فى بدايته بيشتغل عامل فى شركه

وبعزيمته واصراره انه يوصل وصل وفى مصر مش بره مصر يا شباب

انا صوتى وجعنى من الكلام عاوزه اشرب حاجه سخنه بقى

وعندك واحد ينسون سكر زياده لاجمل حنجره بتاعة سمسمه عشان تعرف تكمل كلام وصلحه

ايوه جاااااااااااااااااااااااى

نقطه مهمه جدا يا سمسمه دى فعلا كل شاب بيتخرج مفيش فدماغه غير العربيه والشقه والعروسه والنادى والاحلام اللى مش بتتحقق دى عشان هو تعب وداق المر فى الدراسه ومفكر انه هو كده خلص المتاعب والعواقب والامتحانات فاقد فكرة انه خلص من مرحله معينه وهى مرحلة الدراسه وهيبدا فى مرحله جديده مرحلة الشغل والمسئوليه دى بؤضه من نوابع النظام التعليمى الفاشل

عشان كده بيتخرج الشباب من الجامعه بيتصدمو بالواقع لان مفيش ولا حاجه من اللى اتعلمها فى المدرسه والجامعه ليها علاقه بالحياه العامه

انا صوتى راح خالص وبفقر هاتلى والنبى مخده واى حاجه اتغطى بيها عشان

هنام والله هنام

سوري يا سمسمه مع أحترامي لرأيك الكلام ده كان زمان أيام ما كان فيه خير كان كل واحد ممكن يعمل من نفسه حاجه
هاتيلي حد اليومين دول قدر يعمل من نفسه حاجه
صعب عمرك ما هتلاقي للأسف
و أرجع و أقول ربنا يوفق الجميع و يعمل الي فيه الخير
و يا ريت موضوع جديد نتكلم فيه بعد أزن الجميع
عشان الموضوع ده هيوجع قلب الواحد
و معاك واحد ليمون يروق دم الواحد

و معاك مخده و كبرته لعم بندق عشان هينام و الله هينام
ماشي يا بندق يعني الواحد بلاش يحلم
يعني هوه لا حلم و لا واقع
الواحد يعمل ايه
كان معكم بين الناس
هاتلي الحساب يابني عشان أمشي

هههههههههههههههههههههههه
انت جامد اوى اوى يا كسبر

هاتله ياعم الحساب
الموضوع ميحرقش الدم ولا حاجه هو بس الموضوع ليه ابعاد كتير زى ماقلت يعنى هنسدها من هنا هتتفتح من ناحيه تانيه وانا حاسس انها وسعت اوى من النظام ومش هيعرف يلمها
كان الله فى العون
معكم من قهوة المصريين
بندق الجوهرى
قطاع الاخبار
شبكة المصريين

ياخونا القهوة دة اتفتحت امتى ؟
شوفوا بقى موضوع السفر برة مصر مش فشل يا خوانا دة فرصة وفرصة كويسة جدا كمان وبلاش نوهم نفسنا بحاجات مش حقيقية موضوع السفر والشغل برة مصر دة فية شئ من التضحية والتعب والجهاد كمان ودة مطلوب فى الحياه لان مش كل حاجة هاتلاقيها جوة بلدك او مش شرط تلاقيها ، ومع الظروف اللى بتمر بيها مصر دة من التعداد الرهيب للسكان والعدد فوق الرهيب للخريجين اللى مش لاقين شغل اعتقد ان وجود فرصة للسفر والعمل برة مصر شئ كويس للطرفين لانة بيوجد فرصة للى مش قادر يسافر اكيد فاهمنى
وبعدين ياسمسمة احمد عز مين اللى بدا من تحت الصفر دة هههههههههههههه طب ازااااااااااااى وانا اعمل زية انهى صفر دة اللى بدا من تحتة وانا مستعد اقعد تحتة عمرى كلة

بس الواضح ان صفر احمد عز غير الصفر بتاعنا احنا
هاتى يابنى قهوة مظبوطة اعدل الطاسة

وعندك هنا واحد قهوه مظبزطه ليبيج هارت بتوصيه منى

السفر لبره لو جايلك من كفيل محترم بمرتب تستاهله بفيزا قشطه يبقى ايه المشكله واللى تيجيله الفرصه دى وميمسكش فيها سورى يعنى يبقى عبده
لمن الكلام عن الشباب اللى بيتكلم عن السفر وشاغل كل وقته بالسفر وهو قاعد عالقهوه انا اعتقد انه بيضيع وقت عالفاضى التضحيات يا كينج اللى ممكن يعملها وهو بره لو عمل ربعها هنا صدقنى هيقدر يعيش لكن ماتقنعنيش انه يعرض نفسه للخطر والموت عشان يهج بره مصر بمفهومه عشان يروح يشتغل فى مطابخ وكده ويتجوز واحده من هناك عشان ياخد الجنسيه وميستخباش من الحكومه لا خربيت السفر والبهدله ارجع واقولك هو احنا اتعلمنا وطفحنا الدم 15 سنه دراسه لحد مانتخرج من الجامعه دا لو ماحدش دبلر وال 15 سنه زادو عشان فالاخر استخبى فى ظهر سفينه ولا اقعد فى حمام باخره عشان اوصل عالحدود واقطع بسبورى واعدى السلك بتاع الحدود عشان اشتغل فى المطبخ
لالالا ماعتقدش ان كل الناس ممكن يوافقو على كده خاااااااالص
وغير كده عايز اقولك حاجه مصر فيها شغل وفيها فلوس وفيها كل حاجه لكن في حاجات كتير تانيه مش موجوده هى دى اللى المفروض ندور عليها

وعايز قهوه زياده حليب والله حليب عشان الاسطباحه

ياجماعة انوا قولتوا الحساب عندى ومع احترامى لارئكم كلكم انما انا مع كاسبر فى كل الى قالوا لان فعلا بلادنا دى بقيت خالص كل شئ فية بح وانما لما تسافر برة هتقدر توصل وتحقق كل الى انت عايزة

ياض يا اهوجى مش شفتنى دخلت القهوة ؟؟

فين الشاى الفتلة ابو سكر زيادة بتاعى علشان افووق كده عالصبح

و اركز مع الناس اللى حتقعد عالقهوة؟

هما الناس راحت فين؟؟

الناس موجوده يا بازارو

معلش مكنتش موجوده امبارح فى افتتاح القهوه دى

هى دى القهوة يا اخوانا قطعتوا نفسى قعدت الف فى المنطقة كلها و ادور عليكم على كل قهوة و لحد مالقيتكم هنا و عمال ادور عليك و اتاريك هنا جنبى و الاول كده عايز واحد عناب ساقع علشان امزمز كده و ابدأ اتابع

الموضوع جامد جدا فى فكرته و باشكر بازارو المتالق دائما و كمان باشكر كل الناس اللى كاتبة اراء جميلة فعلا و اسمحولى اعرض عليكم وجهة نظرى فى مسألة السفر للخارج

السفر و الشغل بره و خاصة فى الدول العربية صعب جدا جدا انا محاسب و باشتغل فى السعودية و جيت هنا عن طريق واحد قريبى وواجهت صعوبات كتيرة جدا فى الاول و اهمها اننا كمصريين مش بنتعامل كويس عموما هنا و لان السعودية فيها كذا مليون مصرى لكن معظمهم عمال و حرفيين و بالتالى هما بيعتبروا من قاع المجتمع هنا و بيتعاملوا وحش جدا و ناس كتيرة منهم هربانة و قاعدة فى الخفى يعنى منظرنا وحش فعلا اللى واخد حقه هنا من المصريين هما الاطباء و المهندسين و نوعا ما المحاسبين لان الوظايف دى هما ماعندهمش فيها كفاءات لسة

كمان الغربة مش سهلة و انا لسة شاب صغير و اجمل سنين عمرى عايشها بعيد عن اصحابى و اهلى علشان اقدر ابنى مستقبلى اللى اكيد لو كنت حاقدر ابنيه فى مصر كنت بنيته و انا مع فكرة السفر خاصة ان الظروف فى مصر عارف انها صعبة بس انا باحذر اى واحد بيفكر يجى هنا او اى بلد خليجى تانى فى تضحيات و لازم تستحمل اعباء كتيرة معظمها نفسى الموضوع مش هزار و هنا ماحدش بيرحم حد

و انا اسف لو كنت طولت عليكم بس حسيت انى لازم اقول النصيحة بما يرضى الله

ولا يهمك يا سمسمة

يلا نقعد تانى عالقهوة ؟؟

شكرا يا مهاجر كلامك كويس جدا وواقعى فعلا و يا ريت الكل ياخد باله

احنا معاك اهو على القهوه

طب تحبى نتكلم فى ايه ؟

و شربتى حاجة الاول ولا لسة ؟

لا مشربتش حاجه
وهو انا حد جالى يسألنى تشربى ايه وانا قلت لا
قعدت ادور على القهوجى بتاعكوا محدش رد عليا
ينفع كده برضه
يعنى اقوم اروح قهوه تانيه

لا طبعا

يا بنى انت غبى انت عايز تطفش الزباين

مخصوم منك 3 ايام بلياليهم و علشان قلة ادبك حتفضل واقف جنب ابلتك سمسمة و تشوف كل طلباتها

و الحساب عندى شوف الهانم تشرب ايه

هههههههههههههههه
ابلتك وهانم
ميرسى جدا يا بازارو
هو ده كان عشمى فيكوا برضه

يالا يابنى هاتلى واحد شاى مظبوط ولا خفيف ولا تقيل
لما نشوف ايه نظام القهوه دى فى المشاريب

عقبال مالشاى يجيلك

فكرى لنا كده فى موضوع جامد

» قهوة المصريين من رمضان 2010 (كلو يشاااااااارك)
» البوم سميرة سعيد .. ايام حياتى .. جديد 2008 حصريا من شبكة المصريين
» انا بشكر اصحاب هدا المنتدى الجميل الرائع على المشاركة فى هدا المنتدى